На 22ри септември во Анастасија Центар се одржа музичкиот концерт „После дождот доаѓа сонце“ на вокалната група Анастасија Центар, од класата на дипл. музиколог и поп/џез пејачка Стефанија Милевска Враниќ.
Силниот аплауз и позитивната енергија, беа одговор на публиката, после настапите на талентираните пејачи.
Како солисти настапија Ема, Мартина, Ева, Илина, Бисера, Уна, Иван и Стефанија, на клавијатура свиреше Иван Стефановски и на кахон Павел Талевски.
Концертот ја опфати комплексноста на активностите кои ги нуди Центарот, со сценска изведба во живо на авторски песни и преработени поп, рок и џез хитови. Целта е да се афирмираат младите талентирани музичари кои посетуваат редовно часови по пеење во Центарот за изведувачки уметности, мода, музика и танц „Анастасија Центар“од Битола.
Овој концерт ја одбележа и долгогодишната инклузивна работа на Центарот со лица со атипичен развој. Иван Стефановски, кој има аутизам, долги години креативно твори, се едуцира и е заштитно лице на Анастасија Центар. Неговиот успех и напредок, беше прославен со самиот концерт и со најтопли поздрави, беше испратен на студии во Словенија.
Темата „После дождот доаѓа сонце“ потсетува дека секој треба да го прави тоа што навистина го сака, да помага на другите, да работи на личната самосвест, да негува вистински вредности и со позитивна мисла да верува во подобро утре.
Во текот на овие 26 години се создадени огромен број на перформанси во кои се остава посебен печат на уникатност и иновативност. Препознатливост по водење на талентирани млади артисти кои имаат слободен израз. Поразличен пристап во работата со деца и млади, инклузијата на лица со попречености, танцово – музичките перформанси, се само дел од процесот на израстување на овој Центар во сериозна платформа за поддршка на младите уметници во Битола и регионот.
0 Comments